Цәыббра 29 рзы Аԥсны Адәныҟатәи аусқәа рминистр Олег Барцыц Иавуз Аҭрышба зхадараҿы дыҟоу Ҭырқәтәыла аԥсуа культуратә центрқәа Рфедерациа (Аԥсуафед) аделегациа дырԥылеит.
Аиԥылара рхы аладырхәит Ҭырқәтәылатәи Ареспубликаҿы иҟоу Аԥсны Аҳәынҭқарра азинмчы Змоу ахаҭарнак Ибраҳим Аҩӡба, Аԥсны Аҳәынҭқарра арепатриациазы Аҳәынҭқарратә еилакы ахантәаҩы ихаҭыԥуаа Џьансыхә Лазбеи Асҭамыр Багаҭелиеи, Аԥсны АдәАР Мрагылара Ааигәеи Африкеи Рдепартамент аиҳабы Артур Гагәылиа, Аԥсны Адәныҟатәи аусқәа рминистр ицхырааҩ Едуард Манаргиа, Афедерациа амаӡаныҟәгаҩ хада Шамиль Ешба, Аԥсадгьыл ахь ахынҳәреи аиҿкааратә зҵаарақәеи рзы Афедерациа амаӡаныҟәгаҩ Биулент Ԥачалиа, иара убас Афедерациа адәныҟатәи аимадарақәа рызҵаарақәа рзы адепартамент анапхгаҩы Џьанкат Аиҭек.
Олег Барцыц иҟаиҵаз аԥсшәаҳәаратә ажәахә аҿы иазгәеиҭеит Аԥсны Адәныҟатәи аусқәа рминистрраҟны аделегациа адкылара агәахәара шинаҭо, инаҵшьны иазгәеиҭеит Ҭырқәтәылатәи ареспубликаҿы ҳџьынџьуаа имҩаԥырго аус ду.
"Ҳара лассы - лассы ҳаиқәшәоит, ааигәа Сҭампыл ҳаибабон, уаҟа аинырра актуалтә зҵаарақәа ҳрылацәажәон", ҳәа азгәеиҭеит Олег Барцыц, инаҵшьнгьы иазгәеиҭеит Афедерациеи, Ҭырқәтәыла иҟоу Аԥсны азинмчы Змоу ахаҭарнаки, ҭырқәтәылатәи аграждантә уаажәларра ахаҭарнакцәеи русеицура аҟазшьа бзиа шамоу.
Аиԥылараан Олег Барцыц иара убасгьы дазааҭгылеит Аԥсны Аҳәынҭқарра атәылауаҩшәҟәқәа разхаҵаразы аԥшьгарақәа рызҵаара.
"Ҳара, ҳәарада, аҭыԥ змоу, иахьынӡахәҭоу инарҭбааны излацәажәамыз аԥшьгарақәа ртемақәа ҳрыцклаԥшуеит. Ҳара ас еиԥш аԥшьгарақәа ҳреигәырӷьаны иҳадаҳкылоит. Убри аан еилыкка еилкаатәуп азинмчы змоу Ахаҭарнакрагьы шыҟоу, Аԥсуа Федерациагьы шыҟоу,урҭ асеиԥш иҟоу аусқәа ҭаацәара дук еиԥш еицҿакны еицыҟаҳҵалар шакәу», ҳәа инаҵшьны иазгәеиҭеит иара.
Аԥсуа Федерациа ахада Иавуз Аҭрышба иакәзар Олег Барцыц гәык - ԥсыкала иҟаиҵаз адкыларазы ҭабуп ҳәа иеиҳәеит, Адәныҟатәи аусқәа рминистри Аԥсны ажәлари ирыдиныҳәалеит иааиуа аныҳәа – 1992-1993 шықәсқәа рызтәи Аԥсны Аџьынџьтәылатә еибашьраҟны игаз Аиааира Амш, ареспублика иазеиӷьеишьеит аҭынчреи, аманшәалареи, аринахыстәи аизҳазыӷьареи.
Аиԥылара аҳәаақәа ирҭагӡаны аганқәа ргәаанагарақәа еибырҳәеит аԥсуа диаспореи дареи реинырра аҿиара, акультуратәи агуманитартәи еимадарақәа рырҭбаара, иара убас аԥсуа жәлар рмилаҭтә хаҿреи, рбызшәеи, ркультуреи, ртрадициақәеи реиқәырхара ирзырхоу аԥшьгарақәа рынагӡареи рызҵаарақәа рзы.
Агуманитартә еимадарақәа рырҭбааразы амҩақәа рылацәажәара аконтекст инақәыршәаны Иавуз Аҭрышба иазгәеиҭеит ҳџьынџьуаа рзы актуалра злоу апроблема, авизақәа рыҭара апроцедура аоптимизациа азура ахымԥадатәра иадҳәалоу. Аԥсуафед ахаҭарнакцәа аҳәара ҟарҵеит Аԥсны Аҳәынҭқарра алаларазы авизақәа реиқәыршәаразы арзаҳалқәа рыхәаԥшра аԥҟарақәа роптимизациа иахәаԥшырц, иагьазгәарҭеит иахьатәи аамҭазы уи азы апроцедура акраамҭа иадхалар шалшо, ҳџьынџьуаа аус зуа урыстәылатәи авизақәа рымазаргьы.
Убри инамаданы, Аԥсуафед ахаҭарнакцәа Олег Барцыц иахь аҳәара ҟарҵеит иахәҭоу апроцедурақәа ианырхыслак, уаанӡа ишыҟаз еиԥш, Аԥсны Аҳәынҭқарра азинмчы Змоу ахаҭарнак иахәҭоу агәаҭарақәа анымҩаԥигалак ашьҭахь иахәҭоу авизақәа роура иахәаԥшырц.
Аԥсны Аҳәынҭқарраҿ аделегациа аҟазаараан 1992-1993 шықәсқәа рызтәи Аԥсны Аџьынџьтәылатә еибашьраҟны игаз Аиааира Амш азгәаҭара иазкыз аныҳәатә усмҩаԥгатәқәа ирылахәын.
